Ինչպե՞ս են եղանակային պայմանները ազդում տանիքի ծածկի որակի վրա
Տարին բոլոր, տասներկու ամիս տանիքի ծածկերը գտնվում են արևի ու անձրևի տակ, քամու ու փոթորկի անմիջական ազզդեցության ներքո, և եղանակային պայմաններն, ինչ խոսք, անդրադառնում են տանիքի ծածկերի որակի ու շահագործման ժամկետների վրա:
Տեղյակ լինելով բնական գործոնների թողած հետևանքներին՝ հնարավոր է ընտրել այնպիսի տանիքի ծածկեր, որոնք առավել համապատասխան կլինեն տվյալ կլիմայական գոտուն և եղանակային պայմաններին:
Արևի ճառագայթների ազդեցության տակ տանիքի ծածկերը կարող են գունաթափվել, դեֆորմացվել, ծածկերի որոշ տեսակների դեպքում՝ նույնիսկ հալչել ու ցած թափվել թեք տանիքից: Այս գործոնի հանդեպ կայուն են կղմինդրները, մետաղյա (առանց պոլիմերային ծածկույթի) տանիքի թիթեղները:
Տարվա բոլոր եղանակներին հանդիպող ուժգին քամին կարող է նույնիսկ տանիքի թիթեղներ պոկել: Տանիքի ծածկերը կարող են մեխանիկական վնասվածքների ենթարկվել քամու քշած-բերած ամենատարբեր խոշոր ու ծանր առարկաներից: Այն վայրերում, որտեղ փոթորիկները հաճախակի են, հարկավոր է ընտրել ամուր ու հաստ ծածկեր և հատուկ ուշադրություն դարձնել մոնտաժային աշխատանքներին:
Տեղումները՝ ձյունը, անձրևը, հատկապես ջրահեռացման համակարգերի բացակայության կամ քիչ թեքություն ունեցող տանիքների դեպքում կարող են ցած չթափել, կուտակվել տանիքի ծածկի տակ և ներթափանցել շինության ներս: Այս դեպքում կարևոր է ջրատար խողովակների առկայությունը: Փափուկ տեսակի տանիքի ծածկերը (պոլիմերային մեմբրաններ և այլն) հերմետիկ շերտ են գոյացնում տանիքին, իսկ մյուս տեսակի ծածկերի դեպքում սովորաբար տանիքի տակ տեղադրվում է լրացուցիչ ջրամեկուսիչ շերտ:
Ձմռանը ջերմաստիճանային տատանումները նպաստում են մետաղյա կղմինդրի և պրոֆնաստիլի ստորին հատվածում կոնդենսատի գոյացմանը, ինչի արդյունքում էլ ջերմամեկուսիչ նյութերը խոնավանում են՝ նվազեցնելով ջերմատեխնիկական հատկությունները:
Արդյունքում տանիքը սառչում է, գոյանում է սառցաշերտ, բորբոս: Այս դեպքում նույնպես կարևոր է ջրամեկուսիչ շերտի տեղադրումը և օդի շրջանառության ապահովումը:
Տանիքի վրա կուտակված ձյան հաստ շերտի ազդեցությունից տանիքի թիթեղները կարող են դեֆորմացվել, իսկ ձնհալից գոյացած հեղուկը կարող է վնասել ջերմամեկուսիչ շերտը, ներթափանցել շինության ներս և դառնալ խոնավության հետևանքով առաջացող տհաճ երևույթների պատճառ: Ձյունառատ տեղանքում կարևոր է տանիքի թեքության մեծ անկյունը, որպեսզի ձյունը աստիճանաբար ցած սահի ու թափվի: Տեղին է նաև ձյունարգելների տեղադրումը, որպեսզի ցած թափվող ձյան խոշոր զանգվածները չվնասեն ներքևում գտնվող մարդկանց ու առարկաները:
Ամփոփելով ասենք, որ ցանկացած կլիմայական գոտու և եղանակային պայմանների դեպքում կարևոր են տանիքի ծածկերի հետևյալ հատկությունները՝
- ջրակայունությունը
- հրակայունությունը
- ցրտադիմացկունությունը
- մեխանիկական վնասվածների չենթարկվելը
- կոռոզիայի և դեֆորմացիայի չենթարկվելը
- բորբոսի ու սնկերի համար նպաստավոր պայմաններ չստեղծելը: